Libre albitrio

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

O libre albitrio ye a hipotetica capacidat d'os achents racionals de poder exercer control sobre as suyas accions.

Afrontar ista cuestión ha requiesto comprender a relación entre a libertat y a causa, asinas como conoixer si as leis d'a naturaleza son causalment deterministicas. As diversas posturas filosoficas sobre o tema difieren en a suya opinión sobre si toz os escaicimientos son determinatos u no – determinismo contra indeterminismo – asinas como en si a libertat puet coexistir con o determinismo – compatibilismo contra incompatibilismo. Asinas, os deterministas convencitos argumentan que l'universo ye deterministico, y que ixo fa que o libre albitrio sía imposible.

O prencipio d'o libre albitrio tien connotacions relichiosas, eticas y cientificas. Por eixemplo, en l'ambito relichioso, o libre albitrio puet significar que una deidat omnipotent no exerce o suyo poder sobre as voluntaz y eleccions individuals. En etica, puet significar que os individuos pueden estar responsabilizatos moralment por as suyas accions. En l'ambito cientifico, puet significar que as accions d'o cuerpo, encluyindo-ie o cerebro y a mente, no son de tot determinatas por a causalidat fisica. A cuestión d'o libre albitrio ha estato un tema central dende os prencipios d'o pensamiento filosofico.